Лапатушкі-хуткамоўкі
- Аўтар: Рыгор Барадулін
І зусім
Не крыллем птушкі —
Языкамі лапатушкі,
Хутка мовячы, лапочуць,
Сакатушкамі сакочуць.
* * *
Бач,
Як навастрылі вушкі
Хуткамоўкі-балбатушкі.
І балбочуць, і якочуць.
Ці не збегчы з дому хочуць?
* * *
У нябачанай кватэры
Дзверы
Зробіма з паперы.
Хуткамоўкі змоўкнуць крышку,
Покуль не адчынім кніжку.
* * *
Пасвішчы на пасвішчы,
Курапатак пасвячы.
А, каркуючы карчы,
Пра харчы карцу крычы.
* * *
Спакойна шпакоўню ціхую
Шукае шпак са шпачыхаю.
* * *
Ехалі ў вясёлаё згодзе
Параход на карагодзе,
Карагод на параходзе.
Ім казала пара: годзе!
* * *
Калі жывеш на хутары,
З кампутарам пагутары.
* * *
Не наступі на золку
На золкую зёлку.
* * *
Каштуе колькі колкі
Кончык іголкі?
* * *
Каню не кажы,
Што канюшына ў кашы.
* * *
Рэха вывалілася з арэха
І паехала ў рэхава.
* * *
Мулка зроку ў змроку,
Гулка ўранні кроку.
* * *
Звалілася з вяза ваза,
А з бука
Азбука.
* * *
У Клічава сваё клічава.
У Крычава сваё крычава.
У Лепеля сваё лепліва.
У Магілёва сваё імглёва.
Кую, кую ножку
Кую, кую ножку,
Паеду ў дарожку,
Дарожка крывая,
Кабылка сляпая,
Еду, еду, еду,
Ніяк не даеду.
Прыпрагу сароку,
Паеду далёка,
У новай кашулі
Да майго дзядулі.
Скоранька паеду,
Каб паспець к абеду.
Люлі-люлі, люляшу
Люлі-люлі, люляшу,
Я дзіцятка калышу
Нітачку звіваю,
Песеньку спяваю
Што выведу нітачку-
Камару на світачку,
Застануцца кончыкі
Камару на штончыкі.
Ай, люлі-люлі-люлечкі
Ай, люлі-люлі-люлечкі,
Прыляцелі гулечкі,
Сталі яны буркаваць:
-Чым дзіцятка гадаваць?
-Пакарміце малачком,
Саладзенькім піражком.
Люлі, люлі, люлі
Люлі, люлі, люлі,
Дзеткі ўсе паснулі,
Не спіць толькі коця,
Ходзіць па балоце.
Адмарозіў лапку,
Пайшоў грэцца ў хатку.
Недзе коцю дзецца,
Лапачцы пагрэцца.
Палез на палаткі —
Спалохаўся бабкі.
Палез ён на вышкі —
Там гулялі мышкі.
Так яны дурэлі —
Хвост кату ад'елі.
Пайшоў каток у лясок,
Знайшоў белы паясок.
А котачка узяла
I дзіцяці аддала.
Пайшоў каток пад масток,
Злавіў рыбку за хвасток.
Ці самому з'есці,
Ці дадому несці?
Думаў, думаў каток,
Укусіў адзін разок
I панёс дадому
Дзіцятку малому.
Шаноўныя сябры! Усе матэрыялы сайта ўзятыя з адкрытых крыніц інтэрнэта.
Калі змяшчэнне нейкага кантэнта парушае Вашыя аўтарскія правы, калі ласка, паведаміце пра гэта на мэйл malecha.by@yandex.ru ці праз форму зваротнай сувязі.
Калі вы маеце цікавы матэрыял ці інфармацыю пра падзеі для дзетак, які можна дадаць на наш сайт, калі ласка, падзяліцеся з намі.
Дзякуй!